MajmusSunda News, Kota Bandung, Jawa Barat, Sabtu (3/5/2025) – Menteri Kebudayaan Fadli Zon kungsi netelakeun dina Orasi Kabudayaan Peluncuran Aplikasi Gapura.org (Gala Pustaka Nusantara) di Perpustakaan Ajip Rosidi, (28/4/2025), Indonesia beunghar budayana . Lamun dibandingkeun jeung nagara-nagara sadunya moal aya anu mapakan Indonesia dina hal kabeungharan budayana.
Mimiti ti Aceh nepi ka Papua (ti Sabang nepi ka Merauke), ekpersi budaya urang kacida beurat beungharna sarta warna-warna. Boh ekpresi budaya tina hal manuskrip, ritus, ekpresi seni kayaning seni pintonan, seni tari, musik, seni soara , seni tradisi, luar biasa! Tarian sareng alat musik ti Jawa Barat wae kapanan seueur pisan ragamna,” pokna reueus pisan.
Tah saur Pa Menteri, harta banda anu luar biasa ieu teh kudu jadi Aset Nasional. Sabab Budaya estu mangrupa aset nasional urang anu moal beak-beak sustainable(berkelanjutan), sejen deui jeung SDA (Sumber Daya Alam) kayaning mineral, minyak bumi, batu bara, nikel, jsb, anu ku urang anu salila ieu dianggap jadi kokojo aset nasional, bakal beak, koredas lamun terus-terusan dikali, ditambang, diekslporasi.
Ku kituna Pa Menteri teu weleh peupeujeuh ka balarea jeung ka para pangagung daerah, ulah ngamomorekeun budaya, tapi budaya kudu dipernahkeun panghareupna. Sarta Pemajuan Kebudayaan kudu dijadikeun kawijakan di tingkat proivinsi, kabupaten/kota, jsb.
Sapamadegan jeung hal eta, Rektor Institut Seni Budaya Indonesia (ISBI ) Bandung, Dr. Retno Dwimarwati, S.Sen., M.Hum, nyebatkeun, “Satemenna Indonesia teh nagara Adibudaya, nya ku seni – budaya urang ngamilik kakuatan berdaya saing di kancah internasional.”
Hal eta ditandeskeun Rektor ISBI Bandung, dina prosesi Sidang Terbuka Senat Akademik – Wisuda ISBI Periode Semester Genap Tahun Akademik 2024/2025 poe Saptu, (3/5/2025) di Gedung Kesenian Sunan Ambu, ISBI Bandung Jl.Buah Batu No.212 Kota Bandung. ISBI Bandung harita ngistrenan 124 Wisudawan ti Program D3 (Diploma), S1 (Sarjana), Sarjana Terapan (D4), jeung Program Magister (S2).
Rektor ISBI Bandung dina pangbageana umajak ka para wisudawan sangkan terus berkarya jeung berkontribusi dina widang seni, budaya, ekonomi kreatip, jeung pariwisata, minangka wujud nyata tina Pemajuan Kebudayaan Nasional. Ku sumanget “Ngajomantara”, lulusan ISBI Bandung dipiharep jadi agen parobahan (agent of change) anu siap ngaraeh mangsa hareup, ngarumat ajen-inajen budaya, jeung sanggup bersaing di tingkat global.
Mugia metode pangajaran anu disuprih di ISBI Bandung jadi peso bedah dina ngajalankeun gawe kamaslahatan di masarakat.
“ISBI yakin para wisudawan /wisudawati tos tapis dina kasenian – kabudayaan. Ayeuna pengkuhkeun niat seja ngamalkeun elmu ka masarakat, ngabdi diri demi kamajuan bangsa & Nagara,” kitu peupeujeuh rektor.
Rektor ge ngingetkeun, yen urang geus boga payung hukum, Undang – Undang No. 5 Tahun 2017 ngeunaan Pemajuan Kebudayaan, ku kituna para alumni bisa milu aub jadi kontributor kabudayaan. Lian ti eta aya widang Ekonomi Kreatif anu loba ngahasikeun devisa nagara, anu dijerona ngawengku 17 sub sektor, anu dikokojokeun ku pamarentah. Ku kituna, “ Para alumni tiasa janten agen/kontributor penting dina widang kabudayaan, ekonomi, & industri kreatif, sarta pariwisata. Sadaya ieu mangrupi lahan padamelan kanggo para alumni, “ pokna tandes.
Rektor ge talatah sangkan para lulusan ngamangpaatkan tenolohi digital, kudu beunta tehnolohi. Sabab dina mangsa kiwari satemenna lahan pagawean teh ngalayah saluyu jeung kamekaran zaman, tinggal urang daekna jeung motekar.
Dina hal ieu ISBI Bandung ceuyah ku aktivitas seni-budaya jeung konten anu bisa ngigelan zaman dina zaman digital. ISBI Bandung nyadiakeun portal ensiklopedia Seni pintonan Jawa Barat, “Si Budi, Si Wati”, para alumni bisa jadi palaku utama dina kegiatan ieu.
“Indonesia teh nagara Adibudaya, ngan ku seni budaya urang tiasa mapakan nagara-nagara lianna di kancah internasional. ISBI Ngajomantara, bakal ngawujud ku karancagean sareng kamotekaran para wisudawan. Bral geura laksanakeun, sabab satemenna nya hidep sadaya “agent of change” dina Pemajuan Kebudayaan teh, “ saur bu rektor, daria pisan.
ISBI Bandung Saampar Jabar – ISBI Bandung Ngajomantara
ISBI Bandung terus tatahar jadi agen pemajuan kebudayaan, jadi kokojo panghareupna dina ngamumule budaya Sunda, sarta terus ngabina gawerukun jeung sakabeh pihak, sangkan sakabeh potensi nu aya dina hal atikan (pendidikan), panalungtikan( penelitian), jeung pangabdian ka masarakat (Tri Dharma Perguruan Tinggi), bener-bener karasa ngamagpaatna ku masarakat.
Ku kituna dina hal ieu ISBI Bandung geus ngayakeun saniskara panalungtikan jeung pangapingan dina widang seni budaya di sakuliah Jawa Barat. Kaasup ngirimkeun mahasiwa KKN (Kuliah Kerja Nayata), saperti anu lumangsung cikeneh di Kabupaten Bandung Barat (KBB). Salah sahiji program gawena nyieun lagu Mars 26 Desa di KBB sarta kiwari geus jadi ikon sakabeh desa eta.
Kitu deui di Kabupaten Sumedang , anu sarua mikaheman kana seni- budaya Sunda ,jeung Sumedang hayang jadi Puseur Budaya Sunda, ISBI di dieu geus ngayakeun panalungtikan budaya anu hasilna seja dipasrahkeun ka pihak Kabupaten Sumedang (ngaliwatan Sanggar Pa Ono).
Oge aubna ISBI dina ngaropea jeung ngareuah-reuah puncak acara Milangkala Sumedang anu ka-144 (di Lapangan PPS / Pusat Pemerintahan Sumedang) anu diluuhan ku Gupernur Jawa Barat Kang Dedi Mulyadi sarta ditapuk ku puluhan rebu panongton, geus nembongkeun yen, “ ISBI Bandung tiasa bersinergi sareng Jawa Barat, ku cita-cita nyambuangkeun potensi lokal ka kancah internasional.” Kitu saur bu rektor, bari ngaharewos, ISBI Bandung bakal dibere lahan 13 Hektar di Kabupaten Sumedang, cenah ge.
Hal eta sapamadegan jeung pamanggih Wakil Rektor Bidang Akademik dan Kemahasiswaan ISBI Bandung, Indra Ridwan, S.Sos., M.Sn., M.A., Ph.D, anu peupeujeuh sangkan kampus ulah kurungbatokeun, ngaisolir diri, ukur jadi munara gading. Tapi kudu surti jeung telik kana kabutuh masarakat, kudu aya maangpaatna keur masyarakat , “Nya ha lieu pisan anu kedah ditedunan mah , kedah masihan bongbolongan (solusi) ka masarakat ku elmu pangaweruh hasil nyuprih ti pagurun luhur, eta anu kedah dijurung mah. Urang kedah tiasa ngarasakeun kana kabutuh masarakat, “ pokna tandes.
*******
Judul: Lulusan ISBI Bandung jadi “Agent of Change” Pemajuan Kebudayaan
Jurnalis: Asep GP
Editor: Prof Chye
