MajmusSunda News – Bandung, Jumat (18/09/2026) – Pameran internasional hajatna Program Sarjana Seni Rupa Murni, Fakultas Humaniora dan Industri Kreatif (FHIK), Universitas Kristen Maranatha Bandung, anu diiluan ku 155 pamilon ti 15 nagara ieu, lumangsung ti tanggal 16–19 September 2026 di Exhibition Hall Universitas Kristen Maranatha, Jalan Surya Sumantri No. 65, Bandung 40164.
Kagiatan ieu kalayan resmi dibuka ku Rektor Universitas Kristen Maranatha Bandung anu diwawakilkeun ka Prof. Dr. Pan Lindawaty Suherman Sewu, S.H., M.Hum., M.Kn., Sekretaris Universitas Kristen Maranatha.
Pameran “Hypertextuality” jadi tempat pasamoan gagasan, karya, jeung perspektif seni rupa ti saniskara kasang tukang. Aya 155 pamilon ti 42 institusi jeung 15 nagara anu hasil lolos kurasi, milu aub dina ieu kagiatan.
Pupuhu Program Sarjana Seni Rupa Murni FHIK Universitas Kristen Maranatha, Erika Ernawan, M.Sn., nyebatkeun pasamoan kagiatan kelas jagat ieu mangrupa bagian tina strategi program studi keur nempatkeun institusi dina ekosistem seni rupa global.
“Program Sarjana Seni Rupa di Fakultas Humaniora dan Industri Kreatif, Universitas Kristen Maranatha, kalayan mayeng ngayakeun acara berskala internasional minangka bagian tina strategi sangkan janten bagian ekosistem seni rupa global, sakaligus masihan dampak kanggo komunitas internasional,” kitu ceuk Erika dina pangbageana.
Pameran “Hypertextuality” 2026 nurutkeun Erika, mangrupa salah sahiji bentuk konkret tina éta strategi. Seni rupa murni teu ngan ukur tumali jeung kabisa dina nyieun karya visual, tapi ogé jadi medium pikeun nepikeun gagasan, pangalaman, kritik, réfléksi, jeung respons kana rupa-rupa pasualan anu aya di masarakat.
Pameran ieu dikurasi ku tilu urang kurator ti tilu nagara. Indonesia diwakilan ku Dr. Ismet Zainal Effendi, M.Sn., Portugal ku Prof. Angela Saldanha, jeung Malaya (Malaysia) ku Assoc. Prof. Tarmizi.
Ngawakilan para kurator, Dr. Ismet ngajentrekeun “Hypertextuality 2026” teu ngan ukur jadi tempat mamerkeun karya seni kontemporer ti sakuliah nagara jeung institusi. Tapi éta kagiatan ogé nembongkeun tanggung jawab akademik para pamilon dina ngarespons kamekaran seni rupa global.
Ismet ogé nambahkeun, yén éta respons katilik ngaliwatan kasadaran jeung kaparigelan para pamilon dina ngolah unsur-unsur seni rupa saluyu jeung téma karyana sewang-sewangan.
Pupuhu Pelaksana “Hypertextuality” 2026, Ariesa Pandanwangi, ogé ngeceskeun, yén pameran internasional ieu mangrupa bagian tina program gawe Program Sarjana Seni Rupa Murni anu geus ngaraéh akreditasi unggul, “Program gawe éta salahsawiosna ku jalan muka mimitran seni ngalangkungan gawe rukun lintas institusi sareng lintas nagara. Nya kagiatan ieu realisasina téh,” ceuk Ariesa.
Pasamoan “Hypertextuality” geus nembongkeun posisi seni rupa murni minangka widang anu ngamilik kakuatan dina eksplorasi gagasan, kreativitas, ékspérimentasi medium, jeung kamampuh maca robahna zaman. Ngaliwatan karya, seniman bisa ngawangun dialog lintas budaya sakalian ngahadirkeun perspektif anu teu salawasna bisa ditepikeun maké basa verbal. Ku kalibetna 155 pamilon ti 42 institusi di 15 nagara, “Hypertextuality” 2026 jadi hiji tempat silih tukeur pangaweruh jeung praktik seni anu mataremankeun dunya akademik jeung kamekaran seni rupa kontemporer dina konteks global.
Lian ti pameran, runtuyan kagiatan ogé dieusi ku gunem catur/diskusi seni “Zeitgeist and Hypertextuality” anu dijejeran ku tilu panyatur ti institusi pendidikan seni, nyaéta Dr. Supriatna, M.Sn. ti ISBI Bandung (Seni Rupa Nusantara / Seni Lukis Nusantara), Firman Lie, M.Sn. ti IKJ, (Dari Intertekstualitas menuju Hipertekstualitas” – Membaca kembali Hubungan Antarteks Dalam Seni Rupa Kontemporer), sarta Dr. Ismet Zainal Effendi, M.Sn. ti Universitas Kristen Maranatha.
Judul: FHIK Maranatha Gelar Pameran Seni Rupa Internasional “HYPERTEXTUALITY 2026”
Jurnalis: AGP
Editor: Parkah
