MajmusSunda News, Kota Bandung, Jawa Barat, Rebo (9/04/2025) – Aya nu matak mincut diantara eusi biantara pangbagea Walikota Bandung Muhammad Farhan dina acara Milangkala/Dies Natalis Institut Seni Budaya Indonesia (ISBI) Bandung ka-57 anu lumangsung di Gedong Kasenian Sunan Ambu Jl. Buah Batu No.212 Bandung.
Farhan di hareupeun Senat Guru Besar jeung civitas akademika ISBI Bandung katut tamu ondangan lianna, netelakeun yen inyana maphum lamun urang Sunda hayang ngaganti ngaran Jawa Barat ku Provinsi Sunda.
“Sim kuring ma’lum saupamina diantara urang aya nu gaduh karep ngadamel Provinsi Sunda. Maenya saurna, ari urang Banten kenging ngadamel Provinsi Banten, na ari urang teu kenging ngadamel Provinsi Sunda. Nya mangga eta mah. Upami ngaran Provinsi Sunda langkung payus batan Jawa Barat, mangga. Hal ieu, estu mangrupi bentuk dinamika sareng komunikasi kabebasan berpikir – berekspresi,” kitu ceuk Walikota Bandung tandes.
Walikota ge, anu harita hadir disarengan ku Erry Riyana Hardjapamekas (tokoh pemberantasan korupsi, ekonom, pangusaha), Budayawan Aat Suratin seniorna di SMAN 3 Bandung, jeung Ketua DPRD Jawa Barat Buky Wibawa Karya Guna (Buky Wikagoe), ngembarkeun seja ngabeberes Pendopo Kota Bandung (Kiduleun Alun-alun Bandung) jeung ngarestorasi Kantor Bale Kota (Jalan Wastukencana).
“Pendopo Kota Bandung kedah jadi conto hiji tarekah dina ngokolakeun cagar budaya kelas A, margi pendopo sanes padumukan Farhan sareng Aya (nenehna jenengan garwana, Aryatri Benarto), pendopo mah rumah dines pamingpin Kota Bandung. Pendopo Kota Bandung kedah diwangsulkeun deui ka asalna nalika dibangun taun 1897, joglona kedah dijaga-diriksa sareng ball room anu dipengker ge moal dianggo kangge ruang makan pribadi deui. Janten abdi teu ngagaduhan hak, mung gaduh kawajiban ngarestorasi, diwangsulkeun deui ka pungsi asalna,” kitu saurna daria.
Salian ti ngawilujengkeun, Farhan miharep ISBI Bandung jadi mercusuar pihakna dina ngajalankeun roda pamarentahan ngawangun Kota Bandung anu miboga karakter, Kota Bandung anu sadar yen kabudayaan teh akar kuat anu nanceb ka handap, sumebar kamana-mana ngahasilkeun dahan nu kuat, nyabang nyaliara ka madhab-papat, ngarandakah ngiuhan mere panyalindungan warga kota Bandung anu aya di handapeunana.”
Hal ieu nyoko ka ISBI salaku paguron luhur seni jeung budaya, anu tangtuna dina ngatik ngadidik para mahasiswana teu ngan ukur kasenian tapi ku karakter budaya, jeung sanyatana ceuk Farhan, “Bentuk-bentuk kabudayaan teu mung ukur unsur seni, tapi mangrupi gagasan, ajen-inajen (nilai-nilai), norma-norma, aturan, ide, ideologi palsapah, kayakinan, aktivitas, jeung artepak anu ngabentuk katrakter urang salaku hiji bangsa.”
Kitu deui halna Kota Bandung anu kiwari jadi pangjugjugan balarea, kota Bandung anu akar budaya Prianganna weweg, milik urang sarerea, laju mekar jadi budaya urban, kudu mertahankeun budayana, sangkan tetep boga karakter anu kuat.
“Bandung gaduh akar budaya kuat Priangan, teras mekar janten budaya urban. Tah sangkan Bandung janten kota anu terbuka, urang kedah mastikeun heula gaduh karakter nu kuat, tah karakter nu kuat teh kapanan budaya. Ku kituna, ISBI kedah janten salah sawios mercusuar kanggo pamarentah sarta warga Bandung dina berbudaya, “ kitu ceuk Walikota Farhan ka wartawan. Hal ieu langsung dibageakeun ku rektor ISBI Retno Dwimarwati, “Siap urang ngawangun sasarengan, ISBI Bandung ge sayaga janten agen Pemajuan Kebudayaan di sadaya sektor, “ pokna pasti.
Lian ti kitu, walikota wedalan Fakultas Ekonomi Unpad (95) ge ngingetkeun, yen seni-budaya kudu ngigelan zaman, kudu ngamangpaatkeun tehnolohi bari teu jeung ninggalkeun akar budaya tradisi, “upami dina mangsa kiwari, urang tiasa ngadamel orkestrasi atanapi aransemen musik ukur ngagunakeun hape, hal eta hartosna sanes ngarendahkeun ajen kasenian-kabudayaan, margi kasenian kabudayaan mah kedah sauyunan sareng tehnolohi, nya urang mangpaatkeun we, sangkan budaya urang tumuwuh mekar, “ kitu ceuk Walikota anu baheulana kungsi jadi penyiar radio, presenter, jeung host tv, sarta aktris.
Hal eta sapamadegan jeung Ketua DPRD Buky Wikagoe, “Kabudayaan kedah tiasa ngojayan zaman di satengahing hebatna panarajang banjir globalisasi jeung tehnolohi, sangkan produk budaya teu karem jeung pareum, “ kitu pokna. Tapi Buky ge nilik ISBI geus mimiti nyaluyukeun jeung kamekaran zaman, ngigelan zaman, ngamangpaatkeun tehnolohi sarta milu aub dina program-program di Jawa Barat. Ku kituna, ieu lanceukna Penyanyi Nicky Astria nu geus lila kapeto jadi Koordinator Warisan Tak Benda Jawa Barat teh, miharep dosen-dosen ISBI bisa mere sumbangsih pamikiran demi ngawujudna Perda Kabudayaan Jawa Barat.
Di sejen pihak, Erry Riyana Hardjapamekas, Dewan Penyantun ISBI Bandung, ngingetan ka sakumna civitas akademika ISBI Bandung, yen tugas utama ISBI ka hareupna ngamalkeun jeung kampanyeu budaya-budaya digawe, budaya dispilin, budaya-budaya universal anu tacan diimpelementasikeun ku masarakat Indonesia, kayaning budaya boga kaera (budaya malu) lamun ningali nu sejen hade prestasi jeung rajin digawena tibatan urang, budaya era ngan ukur bisa ngomongkeun batur bari teu ngaragap diri sorangan. Hal-hal nu kieu ceuk Erry, jadi dadasar pikeun kamajuan Indonesia.
Erry ge ngadua’keun, “Mugia ISBI tetep maju sareng jaya! Namung kedah dirojong ku urang sadayana, utamina ku pamarentah daerah, “ cenah ge daria.
Naon anu ditepikeun ku Bapa Erry Ruyana Hardjapamekas memang boga alesan nu kuat, ISBI Bandung anu geus lila jadi agen pemajuan kebudayaan jeung tiap taun medalkeun ratusan malah rebuan sarjana/ seniman anu ngamumule jeung numuwuh-mekarkeun seni-budaya Sunda, tapi kakurangan fasilitas. Utamana tempat/kampus, geus heurin usik, unggal taun kawalahan ku euyeubna calon mahasiswa nu daptar, tacan fasilitas bahan ajar praktek.
Tapi ceuk Ketua DPRD Jabar Buky Wikagoe, ISBI geus boga lahan keur pamekaran kampus 9 hektar di Cikamuning Kabupaten Bandung Barat (KBB), hal ieu kudu dirojong ku pamarentah provinsi Jawa Barat,
“Jeung kapanan kiwari urang gaduh Menteri Kebudayaan, abdi yakin Pa Fadli Zon ge bakal merhatoskeun ISBI Bandung”, pokna tandes.
Dina Milangkala anu ka-57 ieu, ISBI Bandung nyuguhkeun tema: ‘Transformasi ISBI Bandung Menuju Perguruan Tinggi Negeri Badan Layanan Umum (BLU): Preservasi dan Inovasi Kebudayaan Berbasis Teknologi dan Industri Kreatif.’
Tema anu nunjukkeun komitmen ISBI Bandung dina ngalaksanakeun transpormasi kalembagaan pindah status tina Perguruan Tinggi Negeri Satuan Kerja (Satker) jadi Perguruan Tinggi Negeri Badan Layanan Umum (PTN-BLU). Transpormasi ieu tujuanana pikeun ngaronjatkeun fleksibilitas dina ngokolakeun keuangan, mekarkeun inovasi, sarta nguatan gawe rukun lintas sektor. ISBI Bandung terus mekarkeun kualitas pendidikan jeung riset, bari nyaluyukeun jeung dinamika tehnolohi jeung industri kreatip minangka strategi dina ngamumule seni jeung budaya Nusantara.
ISBI Bandung mitembeyan mieling milangkalana dina ping 1 April. Hal ieu dumasar kana hasil Rapat Pleno Senat Akademik anu nganco kana ngadegna Konservatori Tari (KORI), mata holing /cikal bakal ISBI Bandung ngaliwatan Surat Keputusan Walikota Madya Bandung No. 5539/68 tanggal 31 Maret 1968. Perobahan tanggal ieu hasil tinimbangan tina aspek historis (sajarah), strategis, katut kultural lumampahna institusi salaku lembaga pendidikan tinggi seni di Jawa Barat.
Dina momentum ieu ge ISBI Bandung ngukuhkeun dua Guru Besar anyar, nyaeta:
Dr. Benny Yohanes Timmerman, S.Sen., M.Hum., salaku Guru Besar dina widang Ilmu Estetika Teater – Fakultas Seni Pertunjukan (FSP), harita inyana ge nepikeun orasi ilmiah ‘Beberapa Hipotesis Karakteristik Estetika Urban’
Dr. Husen Hendriyana, S.Sn., M.Ds., Guru Besar dina widang Ilmu Seni Kriya – Fakultas Seni Rupa dan Desain (FSRD), orasi ilmiahna : ‘Sustainable Craft Design dan Environmental Craftpreneurship: Pendekatan Inovasi Produk Kriya untuk Mendukung Pencapaian Tujuan SDGs Nasional dan Global.’
Salian ti eta, aya 4 (opat) urang dosen anu purna bakti, nyaeta 1. Dr. H. Mohamad Yusuf Wiradiredja, S.Kar. M.Hum TMT Pangsiun 1 Mei 2025 2. Dra. Ai Juju Rohaeni, MM. TMT Pangsiun 1 Juli 2025 3. Cecep Kusnendi, S.Kar., M.Sn TMT Pangsiun 1 September 2025 , jeung 4. Sunarto, S.Kar., M.Sn TMT anu Pangsiun 1 November 2025 .
“ Ngalangkungan Dies Natalis sareng pengukuhan Guru Besar ieu, ISBI Bandung nandeskeun komitmenna seja teras ngarojong kamekaran seni – budaya Indonesia ngalangkungan jalur akademik, inovasi, sarta kamitraan strategis. Mugia ISBI Bandung ge tiasa janten perguruan tinggi anu unggul sareng mandiri sacara kalembagaan, “ kitu ceuk rektor ISBI .
*****
Judul: Dies Natalis ISBI ka-57 Dihadiran Walikota Bandung jeung Ketua DPRD Jabar
Jurnalis: Asep GP
Editor: Prof. Chye
