MajmusSunda News, Bandung (31/20/2025) – Baheula mah antara taun 50-an – 60-an, mun budak rek asup Sakola (ka TK atawa SR/SD), ku guru atawa ku kapala sakola, cukup ku nitah leungeun kenca atawa leungeun katuhu nyekelan ceuli, leungeun kenca ngaliwatan sirah kudu bisa nyekel ceuli katuhu, atawa leungeun katuhu ngaliwatan sirah kudu bisa nyekelan ceuli kenca, mun bisa, eta budak teh langsung ditarima jadi murid, teu kudu ribet ribet, euweuh aturan make zonasi-zonasian.
Maklum harita, nu arek asup sakola teh masih saeutik, masih corengcang, malah harita mah geus diatur, tiap kelas teu meunang leuwih ti 20 atawa 25 murid.
Atuh sakola sakola nu dipilemburan, mun muridna kurang, sok geumpeur sieun di hotperdom ku juragan Schoolopziener, gancang minangsaraya ka juragan camat, camat mere ultimatum ka lurah atawa kuwu, kudu marengan guru-guru neangan pimurideun.
Breng kuwu atawa lurah jeung guru-guru, asup ka desa desa, teu make afspraak heula, mun penduduk boga budak geus waktuna sakola, teu disakolakeun, atuh puguh wae dicarekan, tapi bari dipapatahan, yen geus alam merdeka mah, rahayat nu teu boga kakayaan, kudu Sakola, kudu palinter, ceuk basa Meneer Asep Zaenal mah Wie niet sterk is moet slim zijn.
Ari zaman ayeuna mah geus beda deui, budak nu rek disakolakeun, kudu disiapkeun heula dirina (ari kolotna mah nyiapkeun duit loba), ambeh manehna gampang nyesuaikeun diri ka lingkungan anyar/Sakola, ambeh manehna resep tur betaheun.
Dina hal nu sarua, hiji budak lamun geus diajar disiplin dina lingkungan kulawargana, sok leuwih gancang adaptasina, tinimbang budak nu sok di ogo ku kulawargana di imah.
Kusabab kitu, ayeuna mah skala skala khusus diperhatikeun, misalna: jangkungna, beurat awak, mental, Umur (kurang sabulan tina katangtuan, teu bisa asup).
Kusabab kitu cenah milu kamajuan jaman, ceuk Havighurst Development Task: supaya budak teh bisa ngagawekeun tugas, dina fase perkembangan, nu diharepkeun ku kurikulum Sakola oge ku masyarakat, ambeh budak teh cageur, bageur, pinter, bener, singer tur wanter. Sabalikna, lamun budak teu bisa nuturkeun aturan sarta kurikulum, bisa gagal , bisa kuciwa, anu engkena Sakolana kasered sered, najan nilai pangboyotna, kapaksa sok ditaekkeun, atuda mun teu naek, sakola katempuhan buntut maung, ku kolotna diontrog, ku Pamarentah digelendeng.
Ari faktor faktor nu mangaruhan kana perkembangan budak ( ieu nu kudu jadi perhatian kolotna jeung guru-guruna), di antarana : intelegensi, jenis kelamin, glandula tina secresi, nutrisi, hawa jeung imah nu sehat, panyakit, culture/ budaya, posisi dina lingkungan kulawarga.
Jadi tina patokan patokan sarta aspek-aspek tadi, jadi aya standar katangtuan yen mun budak keur bisa asup sakola:
- Budak geus kaasup asak dina individual visual motorik (geus bisa nyekelan patlot atawa pulpen, sacara bener).
- Geus bisa diuk rada lila.
- Geus bisa ngabedakeun mana tugas atau bermain.
- Geus bisa ngabedakeun, mana indung bapa, guru, babaturan .
Hartina si budak, geus bisa ngabedakeun antara guru jeung egona (kabiasaan nu diogo ku kolotna di imah), oge geus bisa boga toleransi, ulin bareng jeung babaturan.
*****
Judul: Aturan Budak Leutik Mun Rek Asup Sakola
Penulis: Dr. Ernawan S. Koesoemaatmadja, MBA., M.PSi., CIQA., CQM., CPHRM./Guru Toge
Editor: A.Noor
