MajmusSunda News, Rubrik SASTRA/Esai, Kota Bandung, Jawa Barat, Minggu (15/09/2024) – Artikel berbahasa Sunda dalam Rubrik “SASTRA/Esai” berjudul “Ngabedah Sajak Sunda Kang Ernawan: Lain Ngan Dog Dag Sawala Rebut Balung Tanpa Eusi” ini ditulis oleh: Agung Ilham Setiadi, Pemimpin Redaksi MajmusSunda News.
Guligahna jeung kahariwang atawa kahoncewang Kang Ernawan dina namperkeun kamandang urang Sunda kiwari, ditembrakkeun dina wanda sajak Sunda nu dijudulan “Pepeling: Sedih, Asih” (majmussunda, Sabtu, 14/09/2024).
Mun dibacana saliwat kalayan henteu gemet jeung jero, tangtuna eta kamandang nu aya dina sajak Kang Ernawan, naon kamandangna dina eta sajakna, nenjo talajak urang Sunda kiwari tangtuna moal katohyan.
Nilik kana eusi dina sajak Pepeling: Sedih Asih, tanwande aya kamandang, mun dibedah mah bisa salah sahiji kritik ka papada urang Sunda ayeuna. Dina baris nu kadua nu unina kieu, “Lain ngan dog dag sawala, Rebut balung tanpa eusi”
Dina kalimah ieu Kang Ernawan ngingetkeun geus mangsana urang Sunda, henteu ngan ukur nyarita paguneman, tapi dina emprona henteu ngabungkeuleuk dina alam nyata, nu bisa nyaangan jeung mangpaat pikeun kahirupan urang Sunda nu nyata.
Eta mah rek dina hal nu aya kaitanana jeung widang pulitik, budaya, atikan, dunya usaha, alam sabudeureun nu kiwari geus ruksak, widang tatanen, pangan, sandang, papan, jeung rea-rea deui.
Parandane kitu lain harti urang Sunda dina ketakna teu aya tapakna, tapi geus mangsana eta dog dag nu meh ampir unggal poe teu sirik tiap ngarenghap teu kungsi eureun.
Bisa ditamperkeun ngabungkeuleuk henteu ukur gagasan atawa ide, nu aweuhana leuwih lega, karasa tapak jeung mangpaatna pikeun urang Sunda hususna, utamana urang desa, jauhna mah bangsa Indonesia.
Nu usaha sing anteng usahana, rijkina jeung untungna bisa disisihkeun keur papada jalma nu perlu ditulungan jeung samporet hirup, dina widang atikan sing gemet sangkan bisa nyetak atawa ngalahirkeun jadi jalma nu luhung dina elmu.
Dina widang pulitik teu ukur rame lima taun sakali, bari jeung rahayat mah hirupna teu incah alias susah, nu ceuyah mah ukur pulitisina.
Dina awal sajakna Kang Ernawan merdih kanu Maha Kawasa, Gusti nu Maha Agung, ngajerit maratan langit, ningal urang Sunda nu keur gering, maleukmeuk leungit dangiangna, alatan kurang ka eling, kurang ngaraksa jeung ngariksa.
Antukna Kang Ernawan, terus ngebrehkeun kahariwang jeung kahoncewang urang Sunda dina lakuning hirup nandangan zaman, nu sarwa remeng-remeng, pasalia jeung tetekon hirup, sok komo hukum nu brehna ukur dipake jeung kapentingan panguasa lain jeung rahayat nu keu sarwa susah, paeh poso nyalametkeun nyawa deukeutna beuteung nu lapar.
Tapi teu kituna Kang Ernawan dina baris sajaknu ahir masih aya harepan nu ngagedur dina sumanget nu nu anyar, ku ngadegna atawa lahirna Majelis Musyawarah Sunda disingket jadi MMS.
Kang Ernawan ngajak ka sing saha wae nu ngaku urang Sunda geura singkil, ayeuna geus aya gunung pananggeuhan, dina enas-enasna naon rempak jeung paripolah teh bisa ngajenggelek dina rupa-rupa pagawean nu mangpaatna karasa ku balarea. Cag.
Pepeling: Sedih, Asih
Cocobi Gusti nu agung
Ki Sunda nandangan gering
Maleukmeuk ilang dangiang
Bongan sok kurang kaeling
Kurang ngaraksa ngariksa
Warisan ti nini aki
Kudu ngarasa kaduhung
Naon jasa seuweu siwi
Wedalan Sanghiang larang
Karuhun marenta bukti
Lain ngan dog dag sawala
Rebut balung tanpa eusi
Naon anu digugulung
Kotektak ulah rek cicing
Omat rek bangbang kolentang
Kudu daek ngahariring
Ngahariring lain tembang
Mukakeun sugrining wening
Pipikiran nyemprung mangprung
Jeung mega pairing iring
Ngajajah di alam padang
Tanah Sunda nu dumeling
Hate cus cos sumoreang
Ki Sunda boa rek prang pring
Bale bandung asa suwung
Pancaniti sepi jempling
Padjadjaran parahiang
Timbanganten teu ngajirim
Galuh nu jadi Galeuhna
Leungit lir beurang ku peuting
Ki Sunda kamana suwung
Sare tibra tibra teuing
Kapan MMS geus datang
Siliwangi malih warni
Ayeuna Sunda sing midang
Ulah kajongjonan teuing
Yasana:Ernawan S. Koesoemaatmadja, Anggota Dewan Pini Sepuh/Karamaan/Gunung Pananggeuhan Majelis Musyawarah Sunda (MMS).
***
Judul: Ngabedah Sajak Sunda Kang Ernawan: Lain Ngan Dog Dag Sawala Rebut Balung Tanpa Eusi
Penulis: Agung Ilham Setiadi
Editor: Jumari Haryadi
