MajmusSunda News, Kota Bandung, Jawa Barat, Kamis (22/5/2025) – Hal ieu katohyan nalika Tim pengajuan Prodi Seni Pencak Silat ISBI Bandung jeung usulan Academy of Arts anu dimediasi Yoyon Darsono “Ngadu Bako” jeung Sekda Jabar, Herman Suryatman, di imah Dinas Sekda Jabar Jl. Aria Jipang No. 2 Kota Bandung, Rebo (21/5/2025).
Rawuh harita Rektor ISBI Bandung Retno Dwi Marwati, Prof.Een Herdiani , Alit Didin Suhana, Yoyon Darsono, Deni Poniman, Deden Samsudin, jeung Dadan Setiadi, kaasup Wa Ajis jeung Kang Joel (alumni ISBI) ti aliran Maenpo Cikalong, jsb.
Sekda Jabar, Herman Suryatman, ngapresiasi jeung kacida ngarojongna kana gagasan anu ditepikeun Yoyon Darsono, Rektor ISBI Bandung jeung Alit Didin Suhana.
“Hal ieu bakal ngundakeun usaha dina ngamumule sareng numuwuh mekarkeun sarta ngamangpaatkeun kabudayaan pikeun masarakat, “ saur Herman Suryatman.
Ku kituna Rektor ISBI Bandung, Retno Dwimarwati ge kalintang nganuhunkeunana kana pangrojong ti Sekda Jabar. Ku kituna ceuk rektor, pihakna bakal langsung tatahar ngadegkeun Prodi Seni Penca Silat di Jurusan Seni Tari Fakultas Seni Pertunjukan ISBI Bandung.
“Pencak Silat kedah dilebetkeun kana atikan pormal supados tiasa diwariskeun sacara struktural ka generasi ngora / mahasiswa. Hal ieu ge kalintang utamina kanggo muka jalan gede sasapuan ngalancarkeun ngadegna Academy of arts di Prancis, sakumaha anu diajengkeun ku Pa Alit, ” ceuk Rektor ISBI.
Sakumaha anu pada terang, Alit Didin Suhana teh manten staf UNESCO Prancis anu nga –gol– keun Penca Silat Goes to UNESCO nepi ka diakuna Penca Silat minangka Warisan Budaya Tak Benda (WBTB) ti Indonesia ku UNESCO, taun 2019 di Bogota Colombia.
Guru Besar Tari ISBI Bandung Prof. Een Herdiani ge sapuk, lamun penca silat diasupkeun kana atikan pormal. Seug komo penca silat geus diaku ku Unesco. Ku kituna ceuk Een ulah nepi ka aya kajadian, ku Unesco mah diaku jadi warisan dunia tapi ku urang dimomorekeun.
“Komo urang mah gaduh perguruan tinggi seni – budaya anu tiasa janten wadah ngahijikeun sakumna aliran penca silat anu aya di urang. Supados kamumule sareng diajarkeun ka mahasiswa, ka generasi ngora ku cara anu terstruktur. Hatur nuhun Pa Sekda kana support na,” ceuk Een, anu kungsi ngajabat Rektor ISBI Bandung.
Pangrojong jeung apresiasi ti Sekda Jabar ieu tangtu wae jadi hiji kabingah pikeun Pa Alit, salaku panaratas academy of arts Delegasi Indonesia di Unesco Paris – Prancis.
Alit anu geus puluhan taun dumuk di Paris ge nganuhunkeun ka Yoyon Darsono. Alit memang dina hal ieu ngokojokeun Kang Yoyon jeung wadya baladna pikeun nyawalakeun hal ieu jeung sakabeh pihak utamana pamarentah daerah Provinsi Jabar, atawana jeung pihak Kementerian Kebudayaan RI, kaasup jeung ISBI Bandung, “Mugia Academy of Arts Delegasi Indonesia di Ferancis bakal enggal ngadeg, “ pokna pinuh harepan.
Tim Seja Nepangan Menteri Kebudayaan di Jakarta
Ide gagasan ngadegkeun Academy Of Arts Delegation Indonesia To UNESCO France, ceuk Yoyon, estu hasil pemikiran Alit Didin Suhana anu ditepikeun ka Yoyon Darsono sababaraha taun katukang ngaliwatan telepon langsung ti Paris. Alit minangsaraya ka Yoyon sangkan nyusun tim jeung nepikeun gagasanana ka pihak pamarentah daerah Jawa Barat jeung Kementerian Kebudayaan RI.
Saterusna hal ieu diteruskeun ku Yoyon ka Rektor ISBI Retno Dwimarwati, anu saterusna sapuk pikeun ngayakeun gempungan di ISBI Bandung ping 3 Mei 2025. Kaasup Alit anu harita ngahajakeun datang ti Paris ka Bandung. Rektor ISBI kalintang ngarojongna kana gagasan Academy Of Arts Delegasi Indonesia di Unesco Prancis, sabab ISBI Bandung ge geus lila nataharkeun rek muka Program Studi (prodi) Seni Penca Silat, “Tangtosna hal ieu bakal silih rojong, rukun gawe sasarengan, “ ceuk Yoyon.
Tumali jeung rencana muka Prodi Seni Pencak Silat di ISBI Bandung, “Estu hal ieu mangrupi kawajiban Institusi perguruan tinggi anu gaduh tanggel waler janten bebenteng, ngamumule sareng numuwuhmekarkeun seni budaya Sunda ku cara akademis. Padepokan atanapi paguron, club, sareng para praktisi penca silat tangtos kalintang ngabageakeunana kana ngadegna Prodi Pencak Silat di perguruan tinggi. Tangtosna anggota paguron atanapi padepokan sareng pakempelan penca silat sanesna upami hoyong neuleuman elmu penca anu langkung jero deui tiasa neraskeun kuliah di Prodi Pencak Silat, Fakultas Seni Pertunjukan ISBI Bandung. Tah kapayunna lulusan Prodi Pencak Silat ieu tiasa janten guru atanapi dosen anu bakal nepakeun pangaweruhna ka masarakat,“ kitu ceuk Yoyon.
Keur audiensi (pertemuan pormal) jeung Kementerian Kebudayaan, Yoyon geus ngirim surat ka Menteri Kebudayaan di Jakarta anu diteken ping 1 Mei 2025.
Yoyon ge kalintang nganuhunkeunana ka Pa Sekda anu parantos nampi timna jeung masihan bongbolongan, pangrojong jeung saneskantenna dina enggoning ngajaga, ngariksa, jeung ngapungkeun seni-budaya Sunda ka Jomantara.
“Abdi saparakanca ge nganuhunkeun ka Prof. Dr. Aman Wirakarta Kusumah sareng Prof. Dr. Fauzi Soelaiman, aranjeunna kantos janten Dubes UNESCO Paris, sareng kalintang ngarojongna kana hal ieu , “ kitu ceuk Seniman Sunda jeung Dosen ISBI Bandung anu geus ngalanglang ke 5 Benua ngawanohkeun musik tradisional Sunda. Yoyon anu tapis ngamaenkeun sakabeh alat musik tradisional Sunda, dipikawanoh oge salaku konseptor musik Kolaborasi KRAKATAU BAND ETHNO, pingpinan Dwiki Dharmawan. (Asep GP)
***
Judul: ISBI Bandung Muka Prodi Penca Silat
Jurnalis: Asep GP
Editor: Prof Chye
