MajmusSunda News, Bandung, 30 September 2025 – Nu nyababkeun kalakuan generasi ngora rada mahiwal, memang seueur faktor, di antarana : faktor biologis, sosio-kultural, psikologis, nyaeta: pola asuh, aturan aturan keluarga/rumah tangga, pangalaman traumatik, stress jeung sajabana.
Jadi utamana peran keluarga (rek gede rek leutik), penting pisan dina nurunkeun nilai nilai budi pekerti, tata krama, sopan santun, anggah ungguh, budaya tradisional.
Eta teh tanggung jawab utama, para sepuh alias indung-bapa, supaya turunan urang bisa dihalangan rungkad tur peunggasna nilai agama, budi pekerti, ancaman narkoba, kusabab maranehna tuna kanyaah, tuna kadeudeuh ti kolot kolotna.
Upami hal eta teu karoris ku kolot sareng guruna, anu paling bahaya nyaeta gangguan psikologis, biasana dikawitan ku tingkah laku/kalakuan nu teu tiasa adaptasi ka lingkungan, lami-lami ngajungkiring jadi pribadi nu mahiwal.
Jadi tugas indung & bapa jaman kiwari, leuwih pasiksak ti jaman taun 50-80 an, ayeuna mah kedah ngahangkeutkeun deui tujuan tur pola kahirupan kahareup, ka turunannana, anu geus aya dadasarna ti sesepuh urang baheula, nyaeta lengkah lengkah kahirupan:
Cageur kudu sehat, teu geringan, bageur kudu hade hate, tara curang, tara gusub-gasab, bener kudu satia, tara cidra, loba pertimbangan, pinter kudu gancang mikir, loba kanyaho, loba kabisa, singer bisa gawe gancang, tara nungguan parentah, wanter kudu sonagar, teu eraan.
Hal diluhur teh, kudu diadu maniskeun sareng prinsip sikap atawa panggerna urang sunda, ambeh gumulung ngahiji jadi tetekon barudak ngora pikahareupeun, kudu dilampahkeun, nyaeta:
SILIH ASAH, ngarupakeun re-aktualisasi dina hirup kumbuh masyarakat jahiliyah modern, silih asah dilarapkeun keur minterkeun masyarakat , supaya tohaga, ngaliwatan silih dimbeuh pangarti, jeung elmu praktikna, mangrupa teknologi, budi pekerti, agama, tur norma norma sosial kahirupan.
SILIH ASIH, ngalengkepan rasionalitas kognitif, sarta diembohan nilai afektif, ngajentrekeun yen jalma sejen teh beungkeutan kulawarga, lain dipake atawa dijadikeun alat keur tujuan atawa kapentingan pribadi. Silih Asih ngajarkeun jelema/ Insani keur pikahareupeun, kesetaraan harkat jeung martabat jelema, silih hargaan, tenggang rasa, tong kumaki, sarta solidaritas jeung lingkungan.
SILIH ASUH, dumasar kana nilai Etika, silih ngingetan keur ngajauhan nu goreng, supaya tetep lumampah dina jalan nu dipirido ku Gusti ALLOH SWT. (Etika jeung Moral).
Sugan jeung sugan wae, tetekon hirup titinggal sepuh-sepuh urang, bisa dihirupkeun deui, keur mawa turunan urang kana bebeneran pikahareupeun.
Lain mung diapal cangkemkeun wungkul, dipraktekkeun mah bororaah.
*****
Judul: Lengkah Lengkah Ngurangan Gangguan Perilaku
Penulis: Dr. Drs. Ernawan S. Koesoemaatmadja, M.B.A.
Editor: A. Noor
