MajmusSundaNews, Rubrik SASTRA/Esai, Kabupaten Tasikmalaya, Jawa Barat, Minggu (6/10/2024) – Artikel berbahasa Sunda dalam Rubrik “SASTRA/Esai” berjudul Karatagan Ki Sunda Ngadorong Sumanget Sangkan Sunda Nanjeur di Buana ini ditulis oleh: Agung Ilham Setiadi
Sumanget jeung tekad urang Sunda ditamperkeun ku Kang Ganjar (Prof Dr Ganjar Kurnia DEA manten Rektor Unpad), dina hiji rumpaka jeung tembang Sunda Karatagan Ki Sunda, nu nepi ka kiwari, eta tembang teh ngadorong mawa sumanget urang Sunda sangkan nanjeur di Buana.
Dina baris nu kadua nu unina kieu
Moal rek luncat mulang
Lamun Sunda can meunang
Makalangan…. kumelendang
Nilik kana eta kalimah dina baris nu kadua disebutken Lamun Sunda can meunang, tah aya kalimah Sunda can meunang ieu aya kereteg nu kudu diperjuangkeun ku urang Sunda yen dina sagala hal teh, urang Sunda kudu meunang, dina makalangan jeung kudu kumelendang tong cicing wae, hartina ulah ceehan atawa elehan.
Moal rek luncat mulang dina harti kudu tandes ulah incah balilahan alatan loba halangan, kayaning pangbibita atawa naon wae nu matak urang Sunda teh tikosewad atawa tijalikeuh, dina lajuning laku jeung hirup atawa huripna, teu bisa hudang deui.
Mangsana Urang Sunda Mapag Kahareupna kudu dimimitian ku tekad nu anyar kalayan babarengan bari jeung gawe bareng, naon nu diperjuangkeun ku urang Sunda kudu nanjeur sakumaha nu aya dina rumpaka baris pangahirna nanjeur di Buana.
Samalah Kang Ganjar nyerat nanjeurna oge tilu kali, ieu ngambarkan yen mapag urang Sunda kahareupna lain perkara nu enteng. Nya ayeuna geus ngajenggelek dina beungkeutan atawa kumpulan nu geus jadi kasapukan nu disebut Majelis Musyawarah Sunda atawa MMS.
Der ah urang Sunda sing tanginas, geura singkil jeung carincing pageuh kancing saringset pageuh iket.
Karatagan Ki Sunda
Rumpaka & Tembang : Ganjar Kurnia
Ieu Kuring
Kuring, lalanang Sunda
Kuring, wanoja Sunda
Mikanyaah ka rahayatna
Rek ngarumat lemah caina
Rek ngaruwat budayana,
Moal rek luncat mulang
Lamun Sunda can meunang
Makalangan…. kumelendang
Getih kuring, renghap kuring
Bakti kuring, sukma kuring
Tekad kuring, lengkah kuring
pikeun Sunda
Nanjeur……nanjeur…….nanjeur di Buana
Judul: Karatagan Ki Sunda Ngadorong Sumanget Sangkan Sunda Nanjeur di Buana
Penulis: Agung Ilham Setiadi
Editor: Chye Retty Isnendes
