Ngabage’akeun :
- Hari Komunikasi Internasional
- Hari Buku Nasional
- Hari Ulang Tahun Perpustakaan Nasional RI
MajmusSunda News, Jawa Barat, Sabtu (17/05/2025) – Alhamdulillah, muji sukur pisan, kuring hirup di lingkungan nu resep maca buku, jeung ngajurungkeun maca buku. Aki kuring ngarojong kana maca buku.
Buku pelajaran bisa make’ urut lanceuk, anu baraya, nepi ka kuring SMA, kuring masih ke’ne’h make’ buku Botani karangan Delsman, atawa Me’kanika karya Pekelharing.
Kuring oge’ kungsi maca, surve’y heubeul, ye’n di Bandung, proporsi/ratio Toko buku jeung penduduk leuwih luhur manan Jakarta. Diinget-inget deui, mapayan toko nu apal, ti lingkungan imah, asa deukeut wae’ harita mah. Resep ari ka toko buku, bisa maca, jeung me’mang loba toko buku te’h.
Ti pangkale’rna, Toko Buku Masa Baru jeung Ganaco, di jalan Gereja.
Ngidul ka Braga, meuntas jalan kare’ta api, ka Landmark, toko Van Dorp ke’ne’h harita mah, tokona gede’, blung-blong, sok resep milihan buku bari milu maca.
Ku Bung Karno ngaran-ngaran asing kudu diganti. Toko Van Dorp diganti jadi Toko Permata Nusantara. Masih aya dina ingetan, di hareupeun Van Dorp te’h, pom be’ngsin kone’ng, She’ll, anu ngeusi be’ngsinna manual, jeung pasar kembang nu pindah ka Wastukencana. Aya paragi wisata kuliner, soto Pa Ento lahan robah jadi “Pre’side’nt The’ater”.
Terus ngidul meuntas Suniaraja, gigireun Bioskop Braga Sky, aya toko buku “Palos”.
Ti dinya ngulon jalan Suniaraja, ayeuna mah, hareupeun viaduct aya kios-kios buku bekas.
Ngidul deui di Braga, ka toko buku “Djawa”, angger ke’ne’h, nepi ka ayeuna oge’ “henteu” robah.
Meuntas Braga, aya Toko buku “Insulinde”.
Saeutik ngale’r ti dinya, deukeut Braga Permai, aya toko buku leutik, Toko Trimulia, tadina mah Toko Tremole.
Meuntas jalan Naripan, hareupeun “Sarinah”, aya toko buku “Tiara”.
Di hareupeun Hote’l Homann, tadina mah Toko Buku, duka hilap deui toko buku naon.
Ti dinya meuntas, ngulon, hareupeun Gedung Merde’ka, Toko “Visser”, diganti jadi toko “Tantular”.
Ti dinya ngulon ka alun-alun, aya Toko buku “Vorkink” nu diganti jadi Toko Buku “Sumur Bandung”.
Terus ngulon, di juru aya Toko Buku “Widjaja”.
Ti dinya ka jalan ABC no 19. Apal nomerna, Penerbit Melodie, nge’tan ka jalan ABC 41, Toko Cosmos.
Ti ABC, nge’tan deui ka Cikapundung.
Nu jauh mah ngan apal, tapi kungsi didatangan saperti Toko Malabar, di jalan Oto Iskandar, deukeut parapatan Pungkur, Toko Diponegoro jeung Toko Dahlan.
Di Pasar Andir aya Toko Buku Murni, anu pindah ka jalan Ahmad Yani totogan jalan Naripan/Bungsu.
Ari toko buku alat sekolah (stationery) mah, anu kasohor Toko Buku Keng Bie di jalan Tamblong, aya ke’ne’h jeung Toko Hap Tjiang, di jalan Asia Afrika pas totogan jalan Alketeri.
Ka be’h dieunakeun aya toko buku nu gede’ di jalan Karapitan : Singgalang.
Ari toko kitab mah, asalna Penerbit Al-Maarif, jalan Tamblong, toko kitab anu sohor mah Sindang Kasih di Jalan Sunda, deukeut jalan Bungsu.
Taman Bacaan anu kakoncara, nyae’ta TB Sukaasih, di Jalan De’wi Sartika, totogan jalan Simpang, ayeuna mah ngaleutikan, jadi toko buku Puri, icalan buku Sunda.
Ayeuna mah geus robah. Toko Buku nu terkenal, ukur Gramedia jeung sababaraha ngaran : Togamas, Gunung Agung
*******
Judul: Dina Zaman Kuring Keur Budak, Panineungan dr. Sam Askari Soemadipradja
Penulis: Yuyun Sumarna
Editor: Asep Ruslan
