MajmusSunda News, Kota Bandung, Jawa Barat, Minggu (10/11/2024) – Artikel dalam Kolom OPINI berbahasa Sunda berjudul “Nyieun Paspor di Kantor Pos” ini ditulis oleh: Prof. Dr. Ir. H. Agus Pakpahan, M.S., Anggota Dewan Pinisepuh/Karamaan/Gunung Pananggeuhan, Majelis Musyawarah Sunda (MMS).
“Ayah, kita kena denda karena Andya meninggalkan AS tanpa paspor,” indung barudak ngabejaan yen anak bungsu kuring didenda di Kedutaan AS Jakara basa rek balik deui ka AS, lantaran kaluar ti AS teu mawa paspor. Harita, kajadian taun 1986, budak teh can aya sataun umurna. Disangka ku kuring mah teu perlu paspor lantaran ngaran budak teh nempel ka paspor indungna. Geuning, henteu kitu. Hiji budak nu lahirna di AS otomatis diaku salaku warga AS.
Nya atuh langsung bae waktu maranehna datang ka AS, kuring ngurus paspor AS keur budak anu bungsu. Manehna memang dilahirkeun di AS jadi kudu boga paspor AS.
Kuring ngingkig ka City Hall, neangan kantor imigrasi. Kuring make otak hirup di Indonesia, nyaeta lamun nyieun paspor nya kantor anu dijugjug teh kantor imigrasi. Sakabeh susuratan: KTP, Kartu Keluarga, surat kelakuan baik, jeung sajabana, kudu dibawa. Terus kabayang antrian nu ngajajar dina korsi minuhan rohangan. Terus deuih, engke dicalukan, ditanya itu-ieu, difoto deuih. Beres sakabeh urusan kari ngadagoan informasi beresna paspor.
Horeng, henteu kitu. Kuring panggih di City Hall jeung salah saurang petugas. Manehna ngabejaan, mun rek nyieun paspor anu dijugjug nyaeta kantor pos.
“Kantor pos-na di mana bae, bisa,” ceuk manehna bari rada seuri.
Aya rasa teu percaya ka manehna anu ngabejaan tadi. Moal enya mun nyieun paspor di kantor pos. Ah, taya halangan atuh, da kantor pos mah di kampus oge aya. Malahan ieu kantor pos teh kaliwatan unggal poe da ayana di Union Building, tempat kuring ngariung jeung babaturan.
“Saya mau membuat paspor untuk anak saya, apakah betul di sini?,” kuring nanyakeun ka petugas kantor pos.
“Yes, Sir,” manehna ngajawab bari mastikeun yen bener nyieun paspor teh di kantor pos.
Terus manehna nerangkeun dokumen anu kudu dieusian jeung dokumen anu kudu lampirkeun seperti akte kelahiran pemohon paspor. Kabeh ku kuring disayagikeun, kaasup biayana. Teu lila da pasaratan anu dipenta oge teu loba. Mun teu salah, harita biayana US$ 17.00, sedengkeun dendana leuwih mahal mun teu salah mah US$ 25.00.
“Sir. Ini dokumen yang diminta, sudah saya persiapkan,” kuring ngasongkeun bari nerangkeun.
Petugas pos naliti kabeh dokumen, dibaca hiji-hiji. Teu lila. Terus manehna nerangkeun yen kabeh pasaratan administrasi geus lengkap.
“Dimana saya harus mengambil paspornya nanti,” kuring nanyakeun hayang aya kapastian.
“Nanti paspor datang ke rumah anda,” manehna nerangkeun bari katempo rada seuri. Meureun jero hatena nyeungseurikeun bari mangkarunyaeun teuing, ieu jelema teu nyahoeun cara Amerika ngalayanan warga nagarana, eta warga nagara teh jabaning umurna oge can dua taun.
Bener pisan, teu kungsi dua minggu paspor anak bungsu kuring datang ka apartemen dianteurkeun ku petugas pos. Pangalaman sarupa oge kajadian waktu keur nguruskeun sertifikat kelahiran, nu datang sorangan ka apartemen. Meureun perkara anu sarupaning kieu anu disebut pelayanan prima nagara ka rakyatna. Teu ngaripuhkeun, komo deui bari jeung nyingsieunan.*
***
Judul: Nyieun Paspor di Kantor Pos
Penulis: Agus Pakpahan
Editor: Chye Retty Isnendes
